ઇરફાન પઠાણના મતે ભારતનો આ ઘાતક ખેલાડી પાકિસ્તાન સામેની મેચમાં X ફેક્ટર સાબિત થશે….
આઇસીસી ટી 20 વર્લ્ડકપ 2021 ની ધમાકેદાર શરૂઆત 17 ઓક્ટોબરથી થઇ ગઇ છે. ભારત પોતાની પહેલી મેચ 24 ઓકટોબરના રોજ પાકિસ્તાન સામે રમી પોતાના અભિયાનની શરૂઆત કરશે. ભારતે અત્યાર સુધી ટી 20 વર્લ્ડકપમાં પાકિસ્તાન સામે હારનો સ્વાદ ચાખ્યો નથી.
ભારત અને પાકિસ્તાનની આ મેચ દુબઇમાં રમાશે. તમને જાણીને નવાઇ લાગશે કે આ હાઇવોલ્ટેજ મેચની ટિકિટ માત્ર એક કલાકમાં વેચાઇ ગઇ હતી. આ બંને દેશો વચ્ચેની મેચ જોવા માટે ચાહકો આતુરતાથી રાહ જોતા હોય છે કારણ કે આ બંને ટીમો માત્ર આઇસીસી ઇવેન્ટમાં જ ટકરાઇ છે.
ભારત અને પાકિસ્તાન લાંબા સમય બાદ એકબીજાની સામે જોવા મળશે. ક્રિકેટ નિષ્ણાંતો આ મેચને લઇને ઘણી બધી અટકળો લગાવી રહ્યા છે. આ બધાની વચ્ચે ભારતીય ક્રિકેટ ટીમના પૂર્વ ફાસ્ટ બોલર ઇરફાન પઠાણે મોટી પ્રતિક્રિયા આપી છે.
ઇરફાન પઠાણે ટીમ ઇન્ડિયાના X ફેક્ટરને લઇને વાત કરી છે. પઠાણે એક ક્રિકેટ શોમાં કહ્યું હતું કે, વરુણ ચક્રવર્તી ટી 20 વર્લ્ડકપમાં ભારત માટે ઘણો મહત્ત્વનો ખેલાડી છે. વરુણ ચક્રવર્તી એક રહસ્યમય સ્પીનર છે. તે ગમે ત્યારે મેચ પલટી શકે છે. તે એક મોટો ગેમ ચેન્જર ખેલાડી છે. પરંતુ ટીમ ઇન્ડિયા માટે X ફેક્ટર જસપ્રીત બુમરાહ સાબિત થશે.
ઇરફાન પઠાણે કહ્યું કે, મારા મત મુજબ જસપ્રીત બુમરાહ ટીમ ઇન્ડિયા માટે X ફેક્ટર સાબિત થશે. બુમરાહે પ્રેક્ટિસ મેચમાં ઇંગ્લેન્ડ વિરૂદ્ધ શાનદાર બોલિંગ કરી હતી. આ ઉપરાંત તે એક વિકેટ લેવામાં પણ સફળ રહ્યો હતો. બુમરાહની બોલિંગે ઇંગ્લેન્ડના બેટ્સમેનને આસાનીથી રન કરવા દીધા નથી.
બુમરાહની આ ઘાતક બોલિંગને જોતાં ઇરફાન પઠાણનું માનવું છે કે પાકિસ્તાન સામેની મેચમાં જસપ્રીત બુમરાહ X ફેક્ટર સાબિત થઇ શકે છે. તમને જણાવી દઈએ કે આઇપીએલ 2021 માં મુંબઇ ઇન્ડિયન્સે ભલે પ્લેઓફમાં સ્થાન ન બનાવ્યું હોય પરંતુ જસપ્રીત બુમરાહે જબરદસ્ત બોલિંગ કરી હતી.
